Dubay 2070-yilda: androidlar, uchar superkarlarga aylanuvchi robot itlar va behisob dronlar

Videoda biz 2070-yilda haqiqatga aylanishiga ishonadigan narsalar, jumladan, hozirda mavjud boʻlgan baʼzi texnologiyalar mavjud.

Birinchi navbatda koʻzga tashlanadigani — bu uchar mashinalar.

Uchar taksilar, dron yetkazib beruvchilar va shunga oʻxshash uchar texnologiyalar Dubayda paydo boʻlishi haqidagi taxminlar uzoq vaqtdan beri bor, biroq hozircha hech qaysi amalga oshmagan. Shunday boʻlsada, bu borada koʻplab ishlar qilinmoqda va natijasi kelgusi 5-6 yilda amalga tatbiq etilishiga asos bor.

Videodagi baʼzi robotlar esa allaqachon mavjud, masalan, video oxirida McLaren superkariga aylanadigan Boston Dynamics robot-iti haqida oldin ham maʼlumot bergan edik.

Sinchiklab qaraganda “Yulduzli urushlar” franshizasidagi R2-D2 ga oʻxshash robotni va odam kabi ikki oyoqda turgan boshqa robotni ham koʻrish mumkin.

Video internetda tarqalgach turli izohlar bildirildi:

“1986-yilda odamlar 2023-yil haqida xuddi shunday fikrda edilar, lekin biz hozir qanday yashayotganimizga qarang”, dedi foydalanuvchilardan biri.

“Oddiy insonlar uchar mashinalargacha yetib bora olmaydi, oʻlim va vayronagarchilik shunchaki aqldan ozar darajada boʻladi”, deb yozgan boshqasi.

Boshqa foydalanuvchilar esa videoni haqiqat deb oʻylashgan.

Aslida esa, kelgusi 47 yil ichida nima boʻlishini hech kim bilmaydi, lekin sunʼiy intellekt va robotlar asosiy rol oʻynashi anchayin haqiqatga yaqin.