Sem Altman Marsda yashashni emas, u yerga robotlarni yuborishni istashini aytdi

Texnologiya

31 may, 12:33

OpenAI direktori Sem Altman ilmiy-fantastik filmlardagidek texnologik yangiliklar qilishni maqsad qilgan, ammo u Ilon Mask kabi Marsda yashashni istamaydi.

Oʻtgan hafta London Universitet kollejida boʻlib oʻtgan nutqida, ChatGPTʼni yaratgan OpenAI asoschisi va bosh direktori Altmandan sunʼiy intellekt Marsda inson hayotini oʻrnatishga yordam bera oladimi, deb soʻrashdi.

“Marsga borib yashashni istamayman – bu dahshatli eshitiladi”, dedi u. “Yaxshisi biz avval robotlarni yuborib va Marsda sharoitni biroz yaxshilab olganimiz maʼqul”, deya qoʻshimcha qildi u. “Aslida esa menga Yer koʻproq yoqadi, oʻzimizning sayyora juda ajoyib”.

Altmanning Mars haqidagi qarashlari OpenAI ta'sischilaridan biri va SpaceX bosh direktori Ilon Maskning fikrlaridan keskin farq qiladi, u 2050-yilgacha Qizil sayyoraga bir million odam jo‘natmoqchi ekanligini va yoshi ulg‘ayganida Marsga borishni shaxsan o‘ylashini aytdi.

Albatta, Mask ham Marsga robotlar yuborish haqida izlanishda davom etayapti.

Xususan, 2021-yilda u Teslaning odamsimon roboti Marsda xavfli sharoitlarda ishlash uchun koʻplab ishlab chiqarilishini aytgandi. Maskning taʼkidlashicha, robot Teslaning 2022-yildagi eng muhim loyihasi boʻlib, oxir-oqibat uning elektromobil biznesidan ham “ahamiyatliroq” boʻlishi mumkin. Kompaniya robotning faqat prototiplarini taqdim etgan boʻlsa-da, uning chiqish sanasi hali aniq emas.

Mask 2015-yilda OpenAI asoschilaridan biri bo‘lgan, biroq u Teslaning sunʼiy intellekt boʻyicha manfaatlar toʻqnashuvini aytib, 2018-yilda boshqaruv kengashini tark etgandi.