Ilon Mask: Starship raketasining tarixiy uchirishini kechiktirmoqda!

Texnologiya

08 yanvar, 17:18

SpaceX kompaniyasi o‘zining Starship raketasini yettinchi marta uchirishni bir necha kunga kechiktirdi. Kompaniya asoschisi Ilon Mask X (Twitter) platformasi orqali jonli efirda yangi start sanasini e‘lon qildi — raketa 2025-yil 13-yanvarda uchiriladi.

Dastlab, uchirish 10-yanvar kuniga rejalashtirilgan edi, ammo yomon ob-havo prognozi tufayli ushbu sana o‘zgartirildi. Muhim jihati shundaki, Starship raketasida hech qanday texnik muammo aniqlanmagan.

Starship raketasi ushbu uchirishda orbitaga Starlink V3 sun‘iy yo‘ldoshlarining 10 ta maketini olib chiqadi. Bu maketlar yangi texnologiyalarni sinab ko‘rish uchun yaratilgan bo‘lib, ular internet tezligi va tarmoq quvvatini sezilarli oshirishga mo‘ljallangan.

Yangi Starlink V3 yo‘ldoshlari gigabit tezlikda internet ulanish imkonini beradi va bir soniyada 1 terabitgacha ma‘lumot uzata oladi. Bu esa hozirgi avlod sun‘iy yo‘ldoshlariga qaraganda 10 barobar ko‘proq.

Mazkur sinov orqali SpaceX internet ulanish sifatini yaxshilashni va o‘z tarmog‘ining imkoniyatlarini kengaytirishni rejalashtirgan. Bu missiya kompaniya uchun muhim texnologik qadam bo‘lib, kelajakda sun‘iy yo‘ldosh tarmog‘ini yanada rivojlantirishga zamin yaratadi.