Apple 2024 yil kuzgi taqdimoti 9-sentabrda bo‘lib o‘tadi, iPhone 16 taqdim etilishi kutilmoqda

Apple yaqinda rasmiy tadbir uchun taklifnomalar yubordi. Ushbu maxsus tadbir Toshkent vaqti bilan 2024 yil 9-sentabr kuni soat 22:00 da bo‘lib o‘tadi. Tadbirda iPhone 16 seriyali yangi telefonlar, yangi Apple Watch soatlari va yangi AirPods quloqchinlari taqdim etilishi kutilmoqda.

Mish-mishlarga ko‘ra, iPhone 16 Pro modelining ekrani 6.1 dyuymdan 6.3 dyuymgacha, iPhone 16 Pro Max modeli esa 6.7 dyuymdan 6.9 dyuymgacha kattalashishi kutilmoqda. Standart iPhone 16 modellari esa o‘zgarishsiz qoladi: iPhone 16 6.1 dyuym, iPhone 16 Plus esa 6.7 dyuym o‘lchamda bo‘ladi.

Boshqa mahsulotlar haqida gapiradigan bo‘lsak, mish-mishlarga ko‘ra, Apple Watch Series 10 seriyasi katta ekran bilan chiqadi (Apple Watch Ultra'ga yaqin kattalikda), shuningdek, ingichka va yengil dizayn hamda tezroq ishlaydigan protsessorga ega bo‘ladi.

AirPods 4 quloqchinlari esa ikki xil versiyada chiqarilishi kutilmoqda va ular hozirgi AirPods 2 va AirPods 3 modellari o‘rnini egallaydi.

Ushbu ikki versiya quyidagi jihatlari bilan farq qiladi:

- AirPods 4 standart modeli: AirPods 2 o‘rnini bosadi, simsiz zaryadlash imkoniyati yo‘q va passiv shovqin izolyatsiyasiga ega.

- AirPods 4 yuqori modeli: AirPods 3 o‘rnini bosadi, simsiz zaryadlash imkoniyatiga ega va faol shovqin izolyatsiyasi bilan jihozlangan (quloq ichiga yarim kiradigan faol shovqin izolyatsiyasi).