Keyingisi aniq yaxshiroq boʻladi: Galaxy S24 ideal smartfon boʻlishi mumkinmi?

Galaxy S23 chiqarilganiga koʻp boʻlmasidan flagmanni obdon iPhoneʼlar bilan taqqoslab koʻrishdi, turli ijobiy va salbiy fikrlar toʻplandi: kimdir Samsungni eng zoʻri desa, yana kimdir koreys smartfonlari Appleʼga yetishiga hali necha qovun pishigʻi bor dedi. Shunday bir paytda Samsung Galaxy S seriyasining navbatdagi Galaxy S24 haqida maʼlumotlar tarqala boshladi. Yangi model eng silliq ekranga ega boʻlishi aytilmoqda.

SamLover maʼlumotiga koʻra, Galaxy S24 seriyasi 144 Gts yangilanish tezligiga ega Super AMOLED ekranlarga ega boʻladi. Galaxy S20 seriyasidan boshlab, Samsung oʻzining yuqori darajadagi telefonlarida 120 Gts Super AMOLED ekranlaridan foydalanmoqda. Raqobatchi brendlarning baʼzi oʻyin telefonlari va top flagmanlari 144 Gts yangilanish tezligi ekranga ega boʻlsa-da, Samsung hozirgacha 144 Gts ekranlardan foydalanmagan. Agar soʻnggi maʼlumotlarga ishonadigan boʻlsak, yangi Galaxy S24da aynan 144Hz Super AMOLED ekran ilk bor qoʻllangan qaldirgʻoch model boʻladi.

Shuningdek, navbatdagi Samsung Galaxy S seriyali telefonlari Snapdragon 8 Gen 3 chipsetidan quvvat oladi. Telefonlar UFS 4.1 xotirasi bilan taʼminlanadi.

Kameraga kelsak, Samsung Galaxy S23 seriyasidan boshlab uch yil davomida flagmanlarida 200MP oʻlchamdagi kameralardan foydalanishini maʼlum qilgan. Yangi ma’lumotlar bu xabarni tasdiqlaydi.

Hisobotda, shuningdek, Samsung Galaxy S24, Galaxy S24+ va Galaxy S24 Ultraʼni oddiy uyali aloqa signallari mavjud boʻlmagan muhitlarda qoʻngʻiroq qilish va matn yozish uchun ikki tomonlama sunʼiy yoʻldosh aloqasi bilan jihozlanishi aytiladi. Samsung MX bosh direktori esa bu xususiyatni ommaga taqdim qilishga hali erta ekanligini, chunki texnologiya hali kengayishga tayyor emasligini aytgan.

Demak, Samsung'ning keyingi Galaxy S seriyali telefonlari haqida mazkur bir chimdim xabarlar bilan qanoatlangan holda rasmiy taqdimotni kutamiz.

Avvalroq Samsung S23 Ultra va iPhone 14 Pro Max kameralarining afzallik hamda kamchiligi taqqoslangandi.