Google I/O taqdimoti 10-may kuni bo‘lishi ma’lum qilindi

Google an’anaviy tadbirida hamyonbop Pixel 7A, Pixel plansheti va qisman Pixel 8 smartfonlari namoyish qilinishi kutilmoqda. Planshet va Pixel 7A nihoyat batafsil tanishtirilsa, aslida taqdimoti kuzda bo‘lishi kutilayotgan Pixel 8 haqida ozroq gapirib o‘tilishi mumkin. 

Yana bir kutilayotgan yangilik — Pixel Fold yigʻma telefoni rasmi allaqachon internetda tarqalgandi: Reddit foydalanuvchilaridan biri Nyu-York metrosida Googleʼda ishlaydi, deb gumon qilingan yo‘lovchining qoʻlida ushbu telefonni ko‘rib qolgan edi.

Google I/O doirasida Android 14 ham batafsil tanishtiriladi. Dasturchilar uchun maxsus ishlab chiqilgan Android 14 Developer Preview 2 taqdimotdan oldin chiqarilgan bo‘lsa, kompaniya rejasiga ko‘ra, OS navbatdagi versiyasi 10-may kuni taqdim etilishi kerak. 

Oldinroq, Google Pixel smartfonlaridagi Magic Eraser — rasmdagi keraksiz obyektni oʻchirish funksiyasi Android va iOS uchun Google Photos’da pullik ko‘rinishda taqdim qilingani haqida xabar bergandik.