“Lyuks kopiya”: Xitoyda iPhoneʼning 157 dollarlik qiyofadoshi sotuvga chiqarildi

Smartfon

11 aprel, 18:48

Xitoyning Gionee brendi ichki bozorda iPhone flagman modellariga tashqi jihatdan oʻxshash F1 Plus smartfonini ishlab chiqarmoqda.

Gizmochina nashrining xabar berishicha, smartfon 6,5 dyuymli HD+ oʻlchamli va 60 Gts standart yangilanish tezligiga ega IPS displey bilan jihozlangan. Gionee F1 Plus byudjetli Unisoc T610 chipi, 6 yoki 8 Gb tezkor xotira va 128 Gb ichki xotira bilan jihozlangan. Smartfon, shuningdek, 10 Vt sekin zaryadlashni qoʻllab-quvvatlaydigan 4000 mA/soat batareyaga ega.

Qurilmaning orqa panelida uchta kamera moduli yaqqol koʻrinib turganiga qaramay, ulardan ikkitasi “nomiga qoʻyilgan”, yaʼni ishlamaydi. Yagona kamera 13 megapikselli oʻlchamga ega. 5 megapikselli old kamera iPhone 14ʼda boʻlgani kabi dinamik orolga ega.

Yon panelda barmoq izi — “otpechatka” skaneri, 3,5 mm audio uyasi va operatsion tizimi Android 12 ekanligi ham maʼlum qilindi.

Gionee F1 Plus narxi 1,1 ming yuandan (taxminan 157 dollar yoki 1 809 000 so‘m) boshlanadi.

Ma’lumot uchun, kelgusida taqdim etiladigan barcha iPhone modellari tashqi ko‘rinishi sezilarli o‘zgarishi kutilmoqda.