Qualcomm Snapdragon protsessorlari androidchilar maʼlumotlarini to‘plashi aniqlandi

Texnologiya

28 aprel, 09:20

Ma’lum bo‘lishicha, Qualcomm kompaniyasi ma’lumotlarni himoya qilish xalqaro reglamentiga zid ravishda foydalanuvchilar ma’lumotlarini to‘playdi. Ma’lumotlar esa, ochiq manbada saqlanar ekan.

Nitrokey mutaxassislari Qualcomm protsessorlari Android foydalanuvchilari maʼlumotlarini yigʻishini aniqladi.

Buning uchun Sony Xperia XA2 qurilmasiga /e/OS deb nomlangan Android tizimi ishga tushirildi, tizim “Google xizmatlaridan” butunlay tozalangan (maʼlumki, Google xizmatlari foydalanuvchi maʼlumotlarini faol yigʻadi). Oʻrnatilganidan bir necha soniya oʻtib gadjet izatcloud.net manziliga ulanib olgan.

Maʼlum boʻlishicha, mazkur manzilni Qualcomm boshqaradi, u Izat Cloud deb nomlangan sirli bulutiga maʼlumotlarni yuboradi. Shu bilan birga, maʼlumotlar ushbu manzilga xavfsiz boʻlmagan HTTP protokoli orqali uzatiladi, yaʼni manba istalgan kishi kirishi uchun ochiq.

MacOS vs Windows: qaysi operatsion tizim xavfsizroq va ishonchli?

Qualcomm foydalanuvchi haqida quyidagilarni toʻplaydi:

noyob qurilma identifikatori

chipset nomi

chipsetning seriya raqami

XTRA dasturiy taʼminot versiyasi

mobil mamlakat kodi

mobil tarmoq kodi (mamlakat va simsiz aloqa operatorini aniqlash imkonini beradi)

operatsion tizim turi va versiyasi

qurilmaning markasi va modeli

protsessor va modem soʻnggi yuklanganidan beri oʻtgan vaqt

qurilmada oʻrnatilgan dasturlar roʻyxati

Mutaxassislar aniqlaganidek, Qualcomm XTRA xizmati toʻgʻridan-toʻgʻri AMSS deb nomlangan Qualcomm mikrodasturidan ishlaydi (protsessorlar ishlashi uchun zarur). U smartfonning tarmoq uskunasini, shuningdek, mikrofon va kamerani toʻliq boshqaradi.

Qayd etilishicha, kuzatuv xizmatlari toʻliq olib tashlanganidan keyin ham AMSS yuqoridagi maʼlumotlarni Qualcommʼga joʻnatavergan.

Nitrokey ekspertlarining taʼkidlashicha, kompaniyaning bunday harakati maʼlumotlarni himoya qilish xalqaro reglamentiga (GDPR) ziddir. Bunga javoban Qualcomm advokatlari maʼlumotlarni toʻplash qonuniy ekanligini va Qualcomm XTRA maxfiylik siyosatini buzmasligini aytishdi.

Avvalroq Giglink.uz yangi Windows 11 foydalanuvchilar uchun qanday josuslik qilishi haqida xabar bergan edi.