Google Chromeʼda alohida matnga havola bogʻlash imkoniyati paydo boʻldi. Bu qanday ishlaydi?

Texnologiya

30 aprel, 00:50

Odatda uzundan-uzun maqola, yangilik yoki veb sahifadagi biror-bir gap yoki xabarni ulashish uchun butun boshli veb sahifaning havolasini yuborishga yoki oʻsha manbani skrinshot qilib olishga toʻgʻri keladi. Endilikda Chromeʼning Copy Link to Highlight funksiyasi yordamida maʼlum bir gap yoki qismga olib boruvchi havolani ulashishingiz mumkin.

Bu nega kerak oʻzi?

Aytaylik, juda uzun maqoladagi bir qiziqarli faktni doʻstlaringizga ulashmoqchisiz va ijtimoiy tarmoq yoki blog postingizni oʻqiyotgan odamlar aynan oʻsha faktni qiynalmasdan topib oʻqishini istaysiz. Yangi funksiya bilan shunday holatlarda skrinshot olib uni tagidan havola joylab oʻtirmaysizda shunchaki faktni oʻzini belgilab undagi havolani yuborib qoʻya qolasiz.

Bu asosan manbalar bilan ishlaydiganlar, jurnalist va blogerlar uchun juda qoʻl keladi, ishni osonlashtirib vaqtni tejaydi.

Yangi funksiyadan foydalanish:

Kerakli soʻz, ibora yoki boʻlimni belgilang.

Tanlangan gap ustiga sichqonchaning oʻng tugmachasini bosing va Copy Link to Highlight (“Tanlanganlar uchun havolani nusxalash”)ni tanlang.

Koʻchirilgan havoladan blogingiz, ijtimoiy tarmoqdagi postingiz yoki boshqa joyda foydalaning. Kimdir ushbu havolani bosganida, u toʻgʻridan-toʻgʻri veb sahifaning siz belgilagan boʻlimiga oʻtadi.

Oldinroq Opera o‘zining One — “kelajak brauzeri” ishlab chiqqani, shuningdek, an’anaviy brauzeriga bepul VPN qo‘shgani haqida xabar berilgandi.