Apple Watch kamari rangini kiyimingizga moslab o‘zgartirishingiz mumkin bo‘ladi

Apple Insider nashrining xabar berishicha, Apple brendli aqlli soatlar uchun rangni o‘zgartiruvchi kamarlarni patentlagan. Foydalanuvchilar kamar rangi yoki dizaynini o‘zlari istagan ko‘rinishga o‘zgartirishi mumkin.

Maʼlum qilinishicha, tasmaning oʻzi elektroxrom funksiyasidan iborat iplar bilan toʻqilgan matodan tayyorlanishi mumkin va bir yoki bir nechta iplar unga qoʻllaniladigan kuchlanishga javoban rangini oʻzgartiradi. Kamar rangi yoki naqshlarini toʻgʻridan-toʻgʻri Apple Watch aqlli soatining oʻzida oʻzgartirish mumkin boʻladi.

Patent toʻrtta ixtirochi, jumladan Chjenyu Li, Chia Chi Vu va Silyang Syuga tegishli boʻlib, ular oldinroq tez kunlarda taqdim etiladigan HomePod uchun sensorli matolar yaratish ustida ishlagan.

Bunday kamarlarning sotuvga chiqish sanasi haqida ma’lumot yo‘q. Shu bilan birga ta’kidlash kerakki, Apple ko‘pincha g‘oyalarni patentlaydi, ammo ular amalga oshirilmaydi yoki noma’lum muddatga qoldiriladi.