Appleʼdan yangilanish fasli uchun yangicha rang: iPhone 14 va iPhone 14 Plus modellarida oʻzgarish boʻlishi mumkin

Smartfon

04 mart, 15:54

Biz hali taqdim etilmagan iPhone 15 haqida yangiliklar kutib turgan bir paytda, Apple iPhone 14ʼda oʻzgarishlar qilishi haqida insayderlar xabari tarqaldi. Aytilishicha, tez orada iPhone 14 va iPhone 14 Plus yangicha rangda taqdim qilinishi mumkin.

Yaponiyaning MacOtakara blogi tomonidan eʼlon qilingan Weibo xabariga koʻra, texnologik gigant bahorda sariq rangdagi modellarni chiqarishni rejalashtirmoqda.

iPhone 15 rasmlari internetda tarqaldi. Hali taqdim etilmagan flagman qanday ko'rinish va ranglarda bo'lishi taxmin qilinmoqda.

Weibo xabari rasman tasdiqlanmagan boʻlsa-da, yana bir MacRumors blogi, bir nechta manbalar Apple kompaniyasining PR jamoasi kelgusi hafta yangi iPhone 14ʼning navbatdagi rang varianti yoki boshqa qoʻshimcha funksiyalarini taqdim qilishi mumkinligini tasdiqlayotganini maʼlum qilgan.

Yangi rang sotuvni oshirish va dunyo OAVi eʼtiborini jalb qilish uchun qoʻllanilayotgan marketing taktikasi boʻladi. Misol tariqasida, oʻtgan yili ham kompaniya iPhone 13 seriyalari uchun yangi yashil rang va aprel oyida esa, iPhone 12 va iPhone 12 mini uchun toʻq qizil ranglarni taqdim qilgandi.

Mavzuga doir: Lionel Messi butun Argentina terma jamoasiga 35 ta oltin iPhone buyurtma qildi

Ayni paytda iPhone 14 va iPhone 14 Plus koʻk, binafsha, yarim tun (tim qora), yulduz yorugʻligi (oq/kumush) va qizil rangda sotuvga chiqarilgan, iPhone 14 Pro modellari esa toʻq binafsha, oltin, kumush va kosmik ranglarda mavjud.

14 modellari sariq rangda taqdim etiladimi, yoki yoʻq — hozircha nomaʼlum, balki sotuvga chiqarish vaqti kechiktirilishi ham mumkin. Yorqin och sariq rangda chiqarilishi mumkinligi borasida baʼzi muxlislar bu rang flagmanning yanada koʻproq sotilishiga sabab boʻladi, desa, baʼzilari bunday yorqin sariq rangni qoʻllash noprofessionallarga xos, demoqda.