Oʻzbekistonda aqlli shlemlar ishlab chiqarish uchun 1 million yevro mablagʻ ajratiladi

Texnologiya

27 aprel, 09:17

MyDigitalHelmet — bu aqlli shlem boʻlib, u video va audio orqali ishchilarga masofaviy yordam koʻrsatish imkonini beradi. Qurilma xodimlarni masofaviy malaka markaziga ulaydi, bu esa ularga real vaqt rejimida axborot almashish imkonini beradi.

Oʻzbekistonda aqlli shlemlar ishlab chiqarishni yoʻlga qoʻyishda Italiya texnologiyasi jalb qilish uchun 1 million yevroga yaqin mablagʻ ajratiladi.

Illogic (Italiya) va Mind as Engine (Oʻzbekiston) kompaniyalari hamkorlik memorandumini imzolagan. Maqsad — texnologiyalar transferini amalga oshirish, sunʼiy intellekt, shuningdek, MyDigitalHelmet yechimini yakunlash va uni Markaziy Osiyo bozorida joriy etishdan iborat.

Shlem operator tomonidan ishlatiladigan turli sensorlar va qurilmalardan sogʻliq toʻgʻrisidagi maʼlumotlarni yigʻadi va real vaqtda nazorat qilish uchun uzatadi. Tizim operatorlarning shaxsiy himoya vositalaridan foydalanish qoidalariga rioya qilishini nazorat qiladi. Oʻrnatilgan sensor operatorning oʻrnini aniqlash va harakatini kuzatish imkonini beradi.