Apple insayder maʼlumotlarini tarqatgan xodimni ayyorlik bilan topib, ishdan boʻshatdi

Bu haqda Twitterʼda analyst941 yuzerneymi ostida maʼlumot chop etib kelgan xodimning ukasi xabar berdi.

Insayder MacRumors forumida katta post qoldirdi, unda Apple qanday qilib sizib chiqqan maʼlumotni topishga muvaffaq boʻlgani haqida gapirdi.

Analyst941ʼning opasi Apple kompaniyasida ishlagan va iPad uchun Final Cut Pro va Logic Proni ishlab chiqqan jamoaning tarkibida faoliyat olib borgan.

Apple ichki maʼlumotlarni kim tarqatayotganini aniqlash uchun juda oddiy va ayyorona usuldan foydalandi: kompaniya xodimlariga bir vaqtda iPad ilovalari chiqish sanasini maʼlum qilgan, biroq bunda har kimga har xil sana aytilgan.

Analyst941 maʼlumotni Twitterʼda joylashtirganidan soʻng, Apple xavfsizligi xizmati xodimlari maʼlumotni kim tarqatganini osongina topdi. Surishtiruv ishlari natijasida insayderning opasi ishdan boʻshatildi.

Insayderning maʼlum qilishicha, Apple unga va uning opasiga qarshi qonuniy choralar koʻrishi mumkin. Shuningdek, u endi maxfiy maʼlumotlarni oshkor qilmasligini qoʻshimcha qildi. Analyst941 allaqachon Twitter akkauntini oʻchirib tashlagan, MacRumors profili esa 24 soat ichida oʻchirib qoʻyiladi.

Avvalroq Apple kompaniyasining ehtiyot qismlarini oʻgʻirlagan xodimi 3 yilga qamalgani xabar berilgandi.