Alisa YandexGPT sunʼiy intellekti asosida ishlamoqda. U endi matn yozishi va gʻoyalarni taklif qilishi mumkin

Yangi oʻzgarishlarni istalgan kishi sinab koʻrishi mumkin. SIda oʻqitilgan Alisa Yandex ilovasida, brauzerda, stantsiyalarda va smart televizorlarda ishlaydi. Buning uchun, “Алиса, давай придумаем!” (“Alisa, kel, oʻylab koʻraylikchi!”) deyish kifoya.

Yandex birinchi bosqichda YandexGPT bilan ishlaydigan Alisa faktlar borasida adashishi mumkinligi haqida ogohlantiradi. Bundan tashqari, u hozircha suhbatning kontekstini hisobga olmaydi, lekin bu kelgusida aniq ishlay boshlaydi.

Virtual yordamchi bitiruv kechasi uchun ssenariy yoki biznes maktubi yozishi, sayohat rejasini ishlab chiqishi yoki toʻy sovgʻasiga variantlar taklif qilishi mumkin.

Texnologiya hali sinov bosqichida. Kompaniyaning taʼkidlashicha, joriy ishga tushirish faqat boshlanishi. Neyron tarmoq oʻrganishda davom etmoqda, shuning uchun Alisa kundan-kunga aqlliroq boʻlib boradi.

Ma’lumot uchun, Yandexʼning “Alisa” ovozli yordamchisi faqatgina rus tilida gapiradi. Hozirda kompaniya uni boshqa tillarga oʻqitish uchun mutaxassislarni yollashni boshlagan.