Oʻzbekistondagi ommabop va ishonchli marketpleyslar ma’lum qilindi

Tahlil

20 aprel, 09:55

RCGA agentligi mutaxassislari mamlakatdagi onlayn bozorni o‘rganish maqsadida tadqiqot oʻtkazdi. Unda 18 yoshdan 54 yoshgacha boʻlgan 800 nafardan ortiq mamlakat aholisi ishtirok etdi. Natijada yurtimiz viloyatlari bo‘ylab ommabop onlayn platformalar ro‘yxati taqdim etilgan.

Oʻzbekistondagi onlayn va oflayn bozorlar holatini aniqlashga qaratilgan izlanish natijalariga koʻra, Uzum Market yetakchilik qilmoqda ekan (2022-yilda X Research ECOM agentligi tadqiqotiga koʻra, OLX va AliExpress eng ommabop boʻlgan). Maʼlum boʻlishicha, Uzum Market olti oy ichida mamlakatdagi eng taniqli savdo maydonchalaridan biriga aylandi.

2-oʻrinda OLX va 3-oʻrinda Telegram messenjeridagi internet-doʻkonlari boʻlmoqda. Keyingi oʻrinlarda Instagram, AliExpress, Mediapark, Zoodmall, Olcha.uz va Asaxiy keladi.

“Bozorlar oʻrnini ilovalar egallamoqda”: RGCA mamlakatning onlayn savdo bozori haqida.

Viloyatlar bo‘yicha

Hudud boʻyicha, Qoraqalpogʻiston, Samarqand, Buxoro va Qarshida OLX hali ham birinchi raqamli platforma boʻlib qolmoqda. Biroq Toshkent shahri va Fargʻona vodiysi aholisi onlayn marketpleyslardan birinchi boʻlib Uzumni tilga olishgan — bunga sabab qilib marketpleysning bu hududlarda yetkazib berish punktlarini ochgani, deb olish mumkin.

Uzumning bunday tez ommalashishiga mamlakat boʻylab OAV, TV, radio kabilarda olib borgan yirik reklama kampaniyasi (Ledokol media agentligi maʼlumotlariga koʻra, texnik yoritish 95 foizdan ortiq) yaxshigina hissa qoʻshdi.

Kim ko‘p sotib oladi?

Tabiiyki, xarid qilishda ayollar eng faol boʻlib, ular uchun assortimenti koʻp va tovarlarni olgandan keyin tekshirish hamda sinab koʻrish imkoniyati mavjudligi muhim.

Erkaklar esa nafaqat sotib olishni, balki sotishni ham afzal koʻradilar, shu sababli ular koʻproq OLXʼni tanlaydilar.

Oʻzbekistonliklarni xarid qilish uchun platformani tanlashda:

birinchi oʻrinda doimiy mijozlar uchun sodiqlik dasturi;

ikkinchi oʻrinda, hamyonbop narx;

uchinchi oʻrinda esa, qulay yetkazib berishga ahamiyat beradi.

Albatta, xaridorlarni qamrab olishda turli reklamalarning katta oqimi muhim taʼsirga ega.

Maʼlumot uchun, Research Group Central Asia 2022-yil boshida isteʼmolchi tadqiqot bozorida toʻliq xizmat koʻrsatish agentligi sifatida tashkil etilgan.

Manba: Pr.uz