Aqlli bilakuzuklar haqiqatan ham sog‘liqni aniq kuzatib boradimi?

So‘nggi yillarda aqlli soatlar va fitnes bilakuzuklari kabi zamonaviy qurilmalar odamlar orasida mashhur bo‘lib, ularni har kuni foydalanish odatiga aylantirmoqda. Bu qurilmalar yurak urish tezligi, bosib o‘tilgan qadam soni, uyqu sifati va iste'mol qilingan kaloriyalar kabi ko‘plab sog‘liq ko‘rsatkichlarini kuzatib boradi, shu orqali foydalanuvchilarga ularning sog‘lig‘ini nazorat qilishda yordam beradi. Biroq, bu qurilmalar o‘zlarining va'dalariga muvofiq bu ma'lumotlarni qanchalik aniq o‘lchay olishi borasida shubhalar mavjud.

Ko‘p ilmiy ma'lumotlarga qarasak, bu aqlli qurilmalar yurak urish tezligi va yurak-o‘pka faoliyatini yaxshi o‘lchashi aniqlandi. Lekin, bu qurilmalar energiya sarfini va uyqu sifatini o‘lchaganda katta xatolarga yo‘l qo‘yadi. Masalan, yurak urish tezligi o‘lchanayotganda taxminan 3% xato bo‘lishi mumkin. Energiya sarfi o‘lchanayotganda xato -21.27% dan 14.76% gacha, uyqu sifati o‘lchanayotganda esa 12% dan 180% gacha bo‘lishi mumkin.

Tadqiqotchilarning aytishicha, bu turdagi aqlli qurilmalarining yangi modellari juda tez-tez chiqarilib turiladi, bu esa muammoni yanada kuchaytiradi. Ko‘pgina kompaniyalar har yili yangi mahsulotlarini bozorga chiqaradi, lekin tadqiqotchilar bu tezlik bilan moslasha olmaydi. Biror tadqiqotni boshlashdan natijalarini e'lon qilishgacha bo‘lgan jarayon, odatda, kamida 12 oy vaqt oladi. Bu vaqt ichida o‘rganilayotgan qurilma eskirib qolishi va uni yangi, ko‘proq imkoniyatlarga ega bo‘lgan modellar almashtirib yuborishi mumkin.

Bu tadqiqot natijalari odamlarga aqlli soatlar va fitnes bilakuzuk  qurilmalaridan foydalanishda bir oz ehtiyotkor bo‘lishni maslahat beradi. Ishlab chiqaruvchilar o‘z mahsulotlarining aniqligini juda yuqori deb ta'riflashi mumkin, lekin amalda bu qurilmalar katta xatoliklarga yo‘l qo‘yishi mumkin.