iPhone 17 Pro qanday bo‘lishi mumkin? Yangi rasmlar paydo bo‘ldi

Taniqli insayder Fix Focus Digital iPhone 17 Pro-ning yangi dizayndagi renderlarini Xitoyning Weibo ijtimoiy tarmog‘ida e’lon qildi. 

Ma’lumotlarga ko‘ra, smartfonning orqa qismi ikkita materialdan—alyuminiy va korpus markaziy qismidagi shisha paneldan tayyorlanadi. Bu yechim simsiz zaryadlash imkoniyatini saqlab qolishga imkon beradi.

Shuningdek, Apple orqa kamera blokining dizaynini o‘zgartirishi kutilmoqda. iPhone 17 Pro-da bu blok to‘rtburchak shaklda va shishadan yasalgan bo‘lib, orqa qopqoqdan ingichka alyuminiy chiziqcha bilan ajratilgan.

Fix Focus Digital ta’kidlashicha, iPhone 17 Pro Max modelida “Dynamic Island” maydoni sezilarli darajada qisqartiriladi. Bunga “superlinzalar” texnologiyasi yordam beradi, bu esa displeydagi kesma hajmini kamaytiradi. Ilgari kompaniyaning yangi modellarida Face ID skaneri ekran ostiga joylashtirilib, old kamera uchun kichik kesma qoldirilishi haqida mish-mishlar tarqalgan edi (bu yechim Android smartfonlarida qo‘llaniladi).

iPhone 17 seriyasining taqdimoti 2025-yil sentyabr oyida bo‘lishi kutilmoqda. Mish-mishlarga ko‘ra, Apple Plus-versiyasidan voz kechib, uning o‘rniga atigi 5,5 mm qalinlikdagi rekord darajada yupqa korpusga ega bo‘lgan iPhone 17 Air modelini taqdim etadi.