Instagramda reelsmaker’lar uchun yangi monetizatsiya usuli paydo boʻldi

Gift — monetizatsiya usuli haqida Meta o‘z saytida maʼlum qilgan. Yangi funksiya ayni paytda foydalanish uchun taqdim etilgan.

Haqiqiy pulga konvertatsiya qilinuvchi Gift o‘tgan yili noyabr oyidan buyon sinab ko‘rilayotgandi. Bunda turli foydalanuvchilar Reels egalariga sovg‘a — Gift hadya qilishadi. Bu huddi mobil o‘yinlaridagi donate funksiyasiga o‘xshaydi.

Reelsmaker o‘zining umumiy va taxminiy oylik daromadini Instagram Professional boshqaruv panelida ko‘rishi mumkin. Ushbu to‘lovlar sovg‘a olingan oy tugagandan so‘ng taxminan 21 kundan keyin ijodkorning hisobiga o‘tkaziladi.

Sovg‘alar Instagram ilovasida Stars virtual valyutasiga sotib olinadi, ular narxi 10 dan bir necha yuz “yulduz”gacha bo‘lishi mumkin. Masalan, foydalanuvchilar 45 ta yulduzni 0,99 dollarga, 140 yulduzni 2,99 dollarga yoki 300 yulduzni 5,99 dollarga sotib olishlari mumkin.

Instagram sovg‘a olgan Reels egasi daromadining bir qismini beradi, bunda olingan har bir “yulduz” uchun $0,01 miqdorida to‘lanadi.

“Sovg‘a”larni olgan muallif umumiy balans 100 dollarga yetganda to‘lovlarni haqiqiy pulga aylantirishi mumkin.

Shuni taʼkidlab o‘tish ham kerakki, Facebook Stars “valyutasi” nomi o‘xshash bo‘lsa-da, uni Instagramga o‘tkazib bo‘lmaydi. Shuningdek, videokontent egalariga beriladigan Instagram nishonlari (Badges) ham mutlaqo boshqa monetizatsiya turiligicha qoladi. 

Turli to‘lov usullari va ularning haqiqiy valyutalardan farq qilishi tarmoq foydalanuvchilarni “real qiymatdan” chalg‘itadi hamda Instagram bo‘ylab faolroq “pul aylanishini” taʼminlaydi.  

Hozirda yangi funksiya faqatgina AQSHda mavjud, biroq barcha foydalanuvchilar uchun emas. Aynan qanday foydalanuvchilar undan foydalana olishiga Meta izoh bermagan, bunday imkoniyat bor yoki yo‘qligini Professional boshqaruv Paneli (Professional Dashboard)dan tekshirib olish mumkin.