Oʻzbekistonda havo taksilari joriy qilindi

Biznes

10 may, 17:01

Bunday taksilarda Samarqanddan Buxoroga borib kelish narxi 50 mln soʻmga tushadi.

Avrud Travel va Uzbekistan Helicopters kompaniyasi Samarqanddan Buxoroga va ortga aerotaksiga buyurtma qabul qilmoqda. Bir tarafga uchish narxi — 26 mln soʻm. Vertolyot borti 5 ta yoʻlovchi uchun moʻljallangan va bu 1 kishiga taxminan 5 mln 200 ming soʻm yoki 455$ dan toʻgʻri keladi.

Parvoz davomiyligi — 1,5 soatgacha. Ayni paytda navbatdagi parvoz uchun boʻsh joylar mavjud. Shuningdek, Toshkentdan Buxoro yoki Samarqandga aerotaksi buyurtma qilish ham mumkin, bunda narxlar masofa, vertolyot modeli, bortdagi kishilar soni va manzilda kutish vaqtidan kelib chiqib hisoblanadi.

Maʼlumot uchun, Uzbekistan Helicopters aviakompaniyasi Oʻzbekiston boʻylab vertolyot turlarini tashkil qiladi. Turli tadbir, fotosessiya yoki turlar uchun vertolyot buyurtma qilish mumkin. Fotosessiyalar narxi ham manzildan kelib chiqib hisoblanadi. Odatda bitta vertolyot borti transport modelidan kelib chiqib 4-5 yoki 20 ta yoʻlovchi uchun moʻljallangan boʻladi. Parvozlar vaqti 10 daqiqadan 1,5 soatgacha.

Avvalroq Ukrainaning “Uklon” taksi xizmati Oʻzbekiston bozoriga kirishni rejalashtirayotgani xabar berilgan edi.