Ikkitasi birda: ikkita jip narxidagi 2X Jeep Wrangler

Avto

18 aprel, 08:40

Qarshingizda ikki barobar keng, ikkita eshik va sakkiz oʻrindiqqa ega Jeep Wrangler modeli rasmi. Foydalanish uchun mutlaqo yaroqli boʻlgan mazkur model qanchalik ajabtovur bo‘lmasin, uning ayni paytda muzeyda saqlanishi yanada ajablanarli.

— Bitta Jeep Wranglerdan yaxshiroq nima boʻlishi mumkin?

— Albatta, ikkita Jeep Wrangler.

Boshqa koʻplab Wrangler modellari kabi, bu ekzemplyarning ham ikkita eshigi bor, lekin farqi shundaki, u sakkizta yoʻlovchiga moʻljallangan.

2X oʻlchamdagi mashina hozirda Merzugadagi Marokash milliy avtomobil muzeyida saqlanadi. Ammo model tomosha uchun qoʻyiladigan befoyda eksponat emas — unda bemalol yurish mumkin. Buning isbotini 2013-yili YouTubeʼga joylangan, egizak Jeep Wrangler avtomobilining katta yoʻl boʻylab yurib ketayotgani, boshqa haydovchilarning esa hayron boʻlib kuzatib turgani tushirilgan videoda koʻrish mumkin.

Mashina pastki qismida, ikki kenglikdagi karkas bor, uning ostida gʻildiraklar va muvozanatni ushlab turishga moʻljallangan podveska oʻrnatilgan.

Garchi ikkita mashina qoʻshilishidan hosil boʻlgan boʻlsa-da, mashina faqatgina chap tomonda joylashgan bitta rulga ega. Bizningcha, oʻng tarafda yana bitta rul zarar qilmagan boʻlar edi.

Ikki dvigateldan foydalanish imkoniyati mavjud boʻlsa-da, Jeep Wrangler bitta V6 — modelga qarab 3,6 litr yoki 3,8 litrga hajmli dvigatelga ega boʻlishi ehtimoli katta.