Bu Xiaomining birinchi krossoveri va u Ferrari Purosanguega juda o'xshaydi: Xiaomi YU7ning jonli suratlar va videolari

Xiaomi ikki hafta oldin o'zining birinchi krossoveri - Xiaomi YU7ning rasmiy suratlarini e'lon qilganida ko'pchilikni hayratda qoldirgan edi. Lekin hozir ma'lum bo'lishicha, kompaniya avtomobilni sir tutmayapti: mashina Xitoy yo'llarida hech qanday kamuflyajsiz harakatlanmoqda.

 Jonli suratlar va videolarda Xiaomi YU7 renderlardan ko'ra Ferrari Purosanguega yanada ko'proq o'xshab ketgan.

Xiaomi YU7 elektromobili 2025-yilning birinchi yarim yilligida rasman taqdim etiladi. Lekin mashinaning asosiy texnik xususiyatlari Xitoy Sanoat vazirligi tomonidan allaqachon ma'lum qilingan:

• Mashinaning uzunligi - 5 metrga yaqin (4999 mm)

• Kengligi - 2 metrga yaqin (1996 mm)

• Balandligi - 1.6 metr (1600 mm)

• G'ildiraklar orasidagi masofa - 3 metr (3000 mm)

Mashina 5 kishilik bo'lib, uning harakatlanish tizimi ikkita elektr motordan tashkil topgan. Bu esa elektromobilni to'rt g'ildiragiga ham kuch uzatish imkonini beradi. Mashinaning umumiy quvvati 690 ot kuchiga teng. Ammo kompaniya kelajakda boshqa, ya'ni kamroq yoki ko'proq quvvatli modellarini ham taqdim etishi mumkin.

Hozircha elektromobilning batareya quvvati (bir quvvatlashda qancha masofa yura olishi) haqida ma'lumot berilmagan.