Xiaomi suv o‘tkazmaydigan arzon Redmi 13 smartfonini chiqardi

Xiaomi kompaniyasi Redmi 13 deb nomlanuvchi arzon narxli smartfonini taqdim etdi. Ushbu mobil telefon o‘tgan yili chiqarilgan Redmi 12 ning vorisi hisoblanadi. Bu katta ekran va 108 MP kameraga ega. Bu 13-raqamli liniyadagi birinchi qurilma, deya xabar beradi GSMArena portali.

Redmi 13 6,79 dyuymli IPS-display bilan jihozlangan bo‘lib, u Full HD+ aniqlik, 90 Hz yangilanish tezligi va maksimal 550 nit yorqinlikni ta'minlaydi. Ekran himoyasi Corning Gorilla Glass qattiq shishasi bilan ta'minlanganligi aytilgan, biroq uning avlodi ko‘rsatilmagan.

Smartfonning asosiy kamerasi Samsung ISOCELL HM6 sensoriga ega bo‘lib, 108 MP aniqlik va 3 baravar ichki zum xususiyatiga ega. Orqa panelida 2 MP makromodul joylashgan. Shuningdek, qurilmaning old tomonida 13 megapikselli selfi-kamera mavjud.

Smartfonning ishlash quvvatini deyarli Helio G88 bilan bir xil bo‘lgan MediaTek Helio G91 chipi ta'minlaydi. Qurilma 6 yoki 8 GB tezkor xotira hamda 128 yoki 256 GB ichki xotira bilan ta'minlangan.

5030 mAh quvvatli batareya 33 Vt quvvatli tezkor zaryadlashni qo‘llab-quvvatlaydi, bu orqali batareyani to‘ldirish uchun 62 daqiqa kerak bo‘ladi. Qurilmaning boshqa xususiyatlari orasida naushniklar uchun joy, xotira kartasi uchun slot, suv va changdan himoya bo‘yicha IP53 standarti hamda yon yoqilish tugmasida barmoq izi skaneri mavjud.

Redmi 13 to‘rtta rangda taqdim etiladi va narxi $180 dan boshlanadi.