BYD navbatdagi keskin burilishga tayyorlanmoqda — Xitoy elektromobillari dunyo bozorini zabt etmoqda

Avto

17 fevral, 14:34

Oʻquvchilarimiz Xitoyning elektron gadjetlar ishlab chiqaruvchi Xiaomi kompaniyasi elektromobillar ishlab chiqarishni boshlagani haqida yaxshi bilishadi. Xitoyning boshqa bir avtomobil brendi esa geografik qamrovini kengaytirishda astoydil davom etmoqda.

BYD Co.,Ltd. prezidenti Van Chuanfu Pekindagi BYD Dreamcast konferensiyasida Qin gibrid elektromobilini taqdim etmoqda. Reuters.

Xitoyning elektromobillar “yulduzi” reytingi 2022-yilda Teslaʼdan oshib ketdi, maʼlum qilgan Reuters nashri. Kompaniya rahbarlari brendning mazkur yildagi koʻrsatkichlari elektromobil keltirgan sof daromadi oʻtgan yildagidan 1000% koʻproq boʻlganini koʻrsatishini taʼkidlashdi. Birgina 2022-yilning oʻzida 2 million dona avtomobil tayyorlanib, ishlab chiqarish va sotish hajmi 3 barobarga ortdi. Bu esa Xitoyda sotib olingan elektr transport vositalarining chorak qismiga tengdir.

BYD elektromobillari reytingi Xitoy va dunyo bozorida doimo oldingi oʻrinlarda boʻlib kelgan. Guruhning 108 mlrd dollarlik qiymati esa, elektromobil ishlab chiqaruvchi kompaniyaning yetarlicha tajribasi boʻlmagan sohada maksimal foyda koʻrayotganini isbotlaydi. Bekorga kompaniya prezidenti Van Chuanfu brend nomini “Senga dollarlar olib kelaman”, deb tarjima qilinadi, deb hazillashmagandi.

Bernshteyn tadqiqoti shuni koʻrsatadiki, Xitoyda 2025-yilga kelib yiliga 6,5 million dona elektromobil yetkazilishi kutilmoqda va ularning koʻpchiligi akkumulyatordan quvvat oladigan boʻladi. BYD kompaniyasining mahsulotlari esa umumiy miqdorning yarmidan koʻprogʻini tashkil qilishi taxmin qilinmoqda.

Bunday raqobat isteʼmolchilar uchun hozirda ajoyib imkoniyatlar yaratib bermoqda. Chunki brendlar kundan-kunga yangi modellarni ishlab chiqarish, narxlarni pasaytirish va turli xil yangi funksiyalar qoʻshish bilan bozorda ustunlikka erishish uchun tinmay harakatda.

BYD kompaniyasining boshqalar takrorlashi qiyin boʻlgan afzalliklari mavjud. Jefferesning hisob-kitoblariga koʻra, ular ishlab chiqaradigan akkumulyatorlar raqobatbardosh va hamyonbop. BYD shuningdek, taʼminot zanjirlarida harakatlanishga yordam beradigan uskuna ishlab chiqaradi va u dunyo bozorida oʻz oʻrniga ega boʻlmoqda.