Ehtiyot boʻling, Tesla yashirin kameralari! Tesla elektromobili odamlarni maxfiy suratga olishi maʼlum boʻldi. Bu nega kerak?

Teslaʼning toʻqqiz nafar sobiq xodimi bilan boʻlgan suhbatdan soʻng, Reuters agentligining xabar berishicha, xodimlar tomonidan ulashilgan baʼzi videolarda mijozlar noqulay vaziyatlarda boʻlgan.

Shaxsiy suratlardan tashqari, xodimlar yoʻl-transport hodisalari tasvirlarini ham koʻrishgan va ulashib borgan. Bir sobiq xodimning aytishicha, 2021-yilda haydovchi katta tezlikda velosipedda ketayotgan bolani urib yuborgan YTH videosi Kaliforniyaning San-Mateo shahridagi Tesla ofisida yashin tezligida tarqalgan.

Tasvirlarning baʼzilari shaxsiy chatda ulashilgan boʻlsa, boshqalari esa “bir nechta” xodimlar tomonidan koʻrilgani xabar qilingan.

Tesla oʻzining “Mijozlar maxfiyligi toʻgʻrisidagi bildirishnoma”sida “kamera tasvirlari anonim boʻlib qoladi va siz yoki avtomobilingizni suratga olmaydi” deb taʼkidlaydi. Biroq, Teslaʼning yetti nafar sobiq xodimi Reutersʼga Teslaʼning ichki kompyuter dasturi mijozlarni osongina aniqlashda foydalanish mumkin boʻlgan joylashuv maʼlumotlarini aks ettirishi mumkinligini aytdi.

Hammaga maʼlumki, Tesla bosh direktori Elon Mask boshqalar shaxsiy hayotiga aralashishni xush koʻradi. Jeyms Bondning 1977-yilda suratga olingan “Meni sevgan josus” filmidagi noyob Lotus Espirit suv osti kemasini ham aynan Mask 2013-yilda auksionda qariyb 1 million dollarga sotib olgan edi.

Tesla ham, Mask ham Reutersning holat yuzasidan soʻroviga javob bermadi. Reuters, shuningdek, Tesla kompaniyasining sobiq xodimlari tomonidan tasvirlangan birorta ham video yoki tasvirni ololmadi.

Shuningdek, ushbu holat Teslaʼda bugungi kungacha davom etyaptimi-yoʻqmi — nomaʼlum. Baʼzi sobiq xodimlar Tesla va mijoz oʻrtasidagi kelishuvlar asosida olingan, shaxsiy daxlsiz tasvirlarni koʻrganliklarini tasdiqlashgan xolos.

Tesla xodimlarida bunday yashirin kameralarga olingan suratlarni koʻrish uchun juda koʻp sabablar boʻlishi mumkin. Masalan, Tesla avtomobillaridagi AI tizimlari qisman xodimlar tomonidan oʻqitilishi kerak. Buning uchun sunʼiy intellektning odatda insonlar bilan muloqotini oʻrganib, tajriba toʻplash asosida rivojlantirish mumkin. Yashirin tasvirlar esa, eng haqqoniy natijalarni koʻrish imkonini beradi.

Tesla mashinalarining mijozlarni yashirin tasvirga olishi xato ekanligini oqlaydigan xodimlar ham topilar ekan. Ikki sobiq xodim Reutersga bu holat ularni aslo bezovta qilmasligini aytib, mijozlar Teslaga oʻz maʼlumotlarini olishga rozi boʻlgach, nima boʻlishini bilishlari kerakligini va shundan soʻng kompaniyadan maxfiylikni kutmasliklari kerakligini aytdi.

Teslaʼning baʼzi funksiyalari, jumladan, “Sentry Mode” ham nafaqat mashina egasini tasvirga oladi, balki mashinaga yaqinlashgan kishilarni ham rasm/videoga olishi mumkin. Haydovchilar esa yozib olingan tasvirlarni oʻzlari koʻrishlari mumkin. Nazariy jihatdan, bu xuddi oʻz uyidan turib qoʻshnining hovlisini tasvirga olishga oʻxshaydi. Bu mavzu Gollandiyaning maʼlumotlarni himoya qilish idorasi (DPA) tomonidan yaqinda oʻtkazilgan Teslaʼning maxfiylik buzilishi boʻyicha tergovida koʻtarilgan edi.

Oldinroq Giglink.uz Synactiv xakerlar jamoasi Tesla elektromobilini buzib kirib 100 ming dollarni qo‘lga kiritgani haqida xabar bergan edi.